МОЛИТВЫ И ТРОПАРИ СВЯТОМУ МУЧЕНИКУ ИОАННУ ВОИНУ

От Юлиана, царя безбожного, на убие­ние христиан послан быв, святой Иоанн стратилат, одним от имения своего ты по­могал, других же, убеждая бежать от му­чения неверными, освобождал, и многие за это муки и заточение в темнице от му­чителя претерпел. По смерти нечестиво­го царя, будучи выпущен из темницы, ты в великих добродетелях до кончины сво­ей остаток жизни провел, чистотой, мо­литвой и постом украшаясь, нищим изобильную милостыню подавая, немощных посещая и утешая скорбных. Поэтому во всех печалех наших помощника и во всех случающихся с нами бедах утешителя имеем тебя, Иоанн воинственник, прибе­гая к тебе, молим тебя: будь страстей на­ших исцелитель и страданий наших ду­шевных и телесных избавитель, потому что ты от Бога получил власть полезное ко спасению всем подавать, приснопамят­ный Иоанн, странников питатель, плен­ных освободитель, немощных врач, сирот помощник! Воззри же на нас, чествую­щих священнорадостную память твою, и ходатайствуй за нас пред Господом, что­бы быть нам наследниками Царства Его. Услышь и не отринь нас и поспеши на за­ступление нам, стратилат Иоанн, воров и похитителей обличающий, и хищения, втайне ими совершаемые, верно моля­щимся тебе открывающий и возвращени­ем имущества в радость приводящий лю­дей. Обида и несправедливость тяжелы каждому человеку, который и печалится о потере украденного или без вести про­павшего. Внемли же сетующим, святой Иоанн, и имущество похищенное помоги отыскать, чтобы, найдя его, они прослав­ляли Господа за щедроты Его во веки. Аминь.

О, великий Христов мучениче Иоанне, правоверных поборниче, врагов прогонителю и обидимых заступниче! Услыши нас в бедах и скорбях молящихся тебе, яко дана тебе бысть благодать от Бога печальныя утешати, немощным помогати, неповинныя от напрасныя смерти избавляти и за всех зле страждущих молитися. Буди убо и нам поборник крепок на вся видимыя и невидимыя враги наша, яко да твоею помощию и поборством по нас посрамятся вси являющии нам злая. Умоли Господа нашего, да сподобит ны грешныя и недостойныя рабы Своя получити от Него неизреченная благая, яже уготова любящим Его, в Троице Святей славимаго Бога, всегда, ныне и присно и во веки веков. Аминь.

МОЛИТВА 2-Я

О, мучениче Христов, Иоанне Воине! Храбрый еси во бранех врагом прогонитель и обидимым заступник, всем православным христианом скорый помощник. О, великий заступниче и угодниче Христов Иоанне Воинственниче! Помилуй нас, грешных и недостойных, и заступи в бедах и в скорбех, и в печалех, и во всякой злой напасти, и от всякаго злаго и обидящаго человека: тебе бо дана бысть таковая благодать от Бога, еже молитися за ны грешныя, в бедах и напастех зле страждущия; избави убо нас от обидящих и ненавидящих, буди нам поборник крепок на вся видимыя и невидимыя враги наша.

Православным христианом и воинству во брани даруй на враги победу, яко да твоею помощию и крепким поборством посрамятся вси, творящий рабом своим злая. О, великий поборниче Иоанне Воине! Не забуди нас, всегда молящихся тебе, просящих помощи и неоскудныя милости твоея, и сподоби нас, грешных и недостойных, получити от Бога неизреченная благая, яже уготова любящим Его. Яко подобает Ему всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

МОЛИТВА 3-Я

О, всехвальный, святый великомучениче и чудотворче Иоанне Воине! Моли с нами и о нас Человеколюбца Бога, да не осудит нас по беззаконием нашим, но да сотворит с нами по велицей Своей милости. Испроси нам у Христа Бога нашего тихое и Богоугодное житие, здравие же и во всем благое поспешение, земли плодородие, во всем изобилие и вся ко спасению и житию временному потребная.

О, святый страстотерпче Иоанне! Ныне пред честною твоею иконою припадающе и покланяющеся тебе, молим тя: яви многомощное заступление всем сущим в напастех, скорбех и болезнех, и избави нас от всякаго зла и от обидящаго человека, моли Всещедраго Триипостаснаго Бога, да подаст православным христианом на супостаты одоление, и да укрепит и благословит непременяемым миром и благополучием, яко да твоею помощию и крепким поборством посрамятся вси являющии нам злая, огради нас святыми твоими молитвами во вся дни жизни нашея, умоли Милостиваго Владыку всех, да дарует нам христианскую кончину жития нашего безболезненну, непостыдну, мирну, Божественных Тайн причастну; по исходе же нашем от жития сего да оградит нас святых ангел ополчением, во еже избавитися нам от козней диавола и тяжких воздушных мытарств его, и неосужденным предстати Престолу Господа славы, и Того со всеми святыми славити в Небеснем Царствии Его во веки веков. Аминь.

МОЛИТВА 4-Я

О, преславный угодниче Христов Иоанне Воинственниче, храбрый еси в ратех, врагом прогонитель и обидимым заступник, всем православным христианом великий заступниче и угодниче Христов!

Помяни нас, грешных и недостойных рабов, в бедах, скорбех и печалех, и во всяцей злей напасти, и от всякаго злаго и обидящаго человека защити нас: дана бо тебе благодать от Бога молитися за нас, грешных, зле страждущих.

Избави нас от обидящих нас, буди нам поборник крепок на вся видимыя и невидимыя враги наша, да твоею помощию и крепким предстательством и поборством посрамятся вси являющии нам злая! О, великий поборниче Иоанне Воинственниче! Не забуди нас, грешных, молящихся тебе и просящих твоея помощи и неоскудныя милости, и сподоби нас, грешных и недостойных рабов, получити от Бога неизреченная благая, яже уготована любящим Его, яко подобает Ему всякая слава, честь и поклонение, Отцу и Сыну и Святому Духу, ныне и присно и во веки веков. Аминь.

ТРОПАРЬ, ГЛАС 4

Всеблагаго Бога и Царя благоверный раб и воин явился еси, Иоанне чудодетелю, страдав бо ради веры мужески, блаженно же скончав течение, зриши Всетворца Господа в небесех светлейше, от Негоже прием дарование чудес, страждущим человеком во всяких напастех помогаеши: укрепляеши воины в ратех, от врагов пленения, ран же и внезапных смертей и от бед лютых изымаеши. Темже моли Владыку Христа, приснопамятне, да во всяком обстоянии сотворит нам милость и не введет нас во искушения, но спасет души наша, яко Человеколюбец.

ИН ТРОПАРЬ, ГЛАС 8

Блаженство Евангельское возлюбив, Богомудре Иоанне, чистоту сердца девством почтил еси. Темже суету мира сего пренебрегл, устремился еси зрети Бога, Иже тя прослави чудесы во врачевании различне страждущих. Сего ради молим тя: проси нам у Христа Господа всяких скорбей избавления и получения Царства Небеснаго.

КОНДАК, ГЛАС 6

Благочестиваго воина Христова, победившаго враги душевныя и телесныя богомудренно, Иоанна мученика, достодолжно песньми восхвалим, чудодействуя бо, подает обильная исцеления страждущим людем, и молится Господу Богу от всяких бед спасти правоверныя.

СТИХИРА

Дарованьми чудес обогати тя Христос Господь, в различных бо скорбех призывающим тя помошник скор обретаешися.

Добавить комментарий

Ваш e-mail не будет опубликован. Обязательные поля помечены *