Евангельские изречения

  • Не убойтеся от убивающих тело, души же не могущих убити: убойтеся же паче Могущаго и душу и тело погубити в геенне. Не две ли птице ценитеся единому ассарию? и ни едина от них падет на земли без Отца вашего: вам же и власи главнии вси изочтени суть. Не убойтеся убо: мнозех птиц лучши есте вы. Всяк убо иже исповесть Мя пред человеки, исповем его и Аз пред Отцем Моим, иже на небесех. А иже отвержется Мене пред человеки, отвергуся его и Аз пред Отцем Моим, Иже на небесех (Мф. 10, 28-33).
  • Приидите ко Мне вси труждающиися и обремененнии, и Аз упокою вы: возмите иго Мое на себе и научитеся от Мене, яко кроток есмь и смирен сердцем: и обрящете покой душам вашим: иго бо Мое благо, и бремя Мое легко есть (Мф. 11, 28-30).
  • Аще кто хощет по Мне ити, да отвержется себе и возмет крест свой и по Мне грядет: иже бо аще хощет душу свою спасти, погубит ю: и иже аще погубит душу свою Мене ради, обрящет ю: кая бо польза человеку, аще мир весь приобрящет, душу же свою отщетит; или что даст человек измену за душу свою? приити бо имать Сын Человеческий во славе Отца Своего, со Ангелы Своими, и тогда воздаст комуждо по деянием его (Мф. 16, 24-26).
  • Вся елика аще молящеся просите, веруйте, яко приемлете: и будет вам. И егда стоите молящеся, отпущайте, аще что имате на кого, да и Отец ваш, Иже есть на небесех, отпустит вам согрешения ваша. Аще ли же вы не отпущаете, ни Отец ваш, Иже есть на небесех, отпустит вам согрешений ваших (Мк. 11, 24-27).
  • Якоже хощете да творят вам человецы, и вы творите им такожде. И аще любите любящия вы, кая вам благодать есть; ибо и грешницы любящия их любят. И аще благотворите благотворящим вам, кая вам благодать есть; ибо и грешницы тожде творят. И аще взаим даете, от нихже чаете восприяти, кая вам благодать есть; ибо и грешницы грешником взаим давают, да восприимут равная. Обаче любите враги ваша, и благотворите, и взаим дайте, ничесоже чающе: и будет мзда ваша многа, и будет сынове Вышняго: яко Той благ есть на безблагодатныя и злыя. Будите убо милосерд и, якоже и Отец ваш милосерд есть. И не судите, и не судят вам; и не осуждайте, да не осуждени будете: отпущайте, и отпустят вам… тою бо мерою, еюже мерите, возмерится вам (Лк. 6, 31-38).
  • Не пецытеся душею вашею, что ясте: ни телом, во что облечетеся: душа болши есть пищи, и тело одежды. Смотрите вран, яко не сеют, ни жнут: имже несть сокровища, ни житницы, и Бог питает их: кольми паче вы есте лучши птиц? Кто же от вас пекийся может приложити возрасту своему лакоть един? Аще убо ни мала чесо можете, что о прочих печетеся? Смотрите крины, како растут: не труждаются, ни прядут: глаголю же вам, яко ни Соломон во всей славе своей облечеся, яко един от сих. Аще же траву на селе днесь сущу и утре в пещь вмещему, Бог тако одевает: кольми паче вас, маловери! И вы не ищите, что ясте, или что пиете: и не возноситеся: всех бо сих языцы мира сего ищут: ваш же Отец весть, яко требуете сих: обаче ищите Царствия Божия, и сия вся приложатся вам (Лк. 12, 22-31).
  • Не бойся, малое стадо: яко благоизволи Отец ваш дати вам Царство. Продадите имения ваша и дадите милостыню. Сотворите себе влагалища неветшающа, сокровище неоскудеемо на небесех, идеже тать не приближается, ни моль растлевает. Идеже бо сокровище ваше, ту и сердце ваше будет. Да будут чресла ваша препоясана, и светилницы горящии: и вы подобии человеком, чающим господа своего, когда возвратится от брака, да пришедшу и толкнувшу, абие отверзут ему (Лк. 12, 32-37).
  • Аще любите Мя, заповеди Моя соблюдите (Ин. 14, 15).
  • Сия есть заповедь Моя, да любите друг друга, якоже возлюбих вы. Болши сея любве никтоже имать, да кто душу свою положит задруги своя (Ин. 15, 12-13).

 

 

Добавить комментарий

Ваш e-mail не будет опубликован. Обязательные поля помечены *