Покаяние узника пред Богом

Господи Боже мой! По единой токмо благости Своей Ты от небытия мя в бытие привел еси и Своим образом украсил меня. Аз же не помыслих довольно благодарити Тя, ни яко даровал еси мне жизнь, ниже яко поставил еси мя над всеми земными тварьми, аки царя их. Ты сподобил мя еси прияти святое крещение, егда бех младенец, Аз же из детства моего не сохраних благодати крещения: начен бо из млада лгати, сквернословити, составляти сладострастные песни, ленитися, утаевати чужое, противитися повелением моих родителей, презирати добрые советы старейших мя, младших же мене леты всуе бити рукою. Егда же приидох в возраст мужества, предахся различным страстем: пиянству, блуду, злоприобретению, гневу, гордости. И тело мое и душу всеконечно оскверних грехами. В кую скверну телесную не впадох аз окаянный? В коей нечистоте плотстей не вообразих себе явственна и в сновидении? Кое зло не помыслих в души моей? Коль многая неподобная мечтания взыдоша в душу мою! Колико себялюбец бых аз, не помышляяй имети христианския любве к ближнему! Ожесточих аз, окаянный, мое сердце толико, яко ни от молений, ни от слез, ниже от стона страждущих по моей злобе или корысти не умиляхся. По сем же явная моя преступления не исповедах пред судиями. Множицею лгах на суди, и не смущахся. Не бысть пред очима моима ни стыдения человеческа, ни страха Божия. Забывах заутра и в вечер творити молитвы, ниже единою оградити себе крестным знамением, являяй себе яко безбожна. Уклоняхся и в беседе с ближними моими воспоминати имя моего Создателя и Спасителя. Имя же врага спасения моего, диавола, увы мне, неразумному! — почасту вспоминах. Аще и приях благая от руки Твоея, Милостиве Господи, аще и видех болезни и иные посещения на моих ближних, обаче от сего не умудряхся к покаянию пред Тобою. И тако до конца аз отступих от Тебе, Господа моего! Отидох от Тебе, яко блудный сын, на страну далече: удалихся не местом  вездесущ бо еси Ты, и ничто не может от Тебе утаитися — воистину же духом и житием моим. Образ и подобие Твое помрачих во мне: уподобихся же паче падшим духовом, имже и предах себе. О! Могу ли помыслити от начала мира быти подобна мне грешника? Горше самих христоубийц аз, окаянный, согреших. Тако удалився Тебе, достигох и до сея темницы, содеяхся именем и житием моим преступник. Но Господи, Господи! Оставих Тя, не остави мене. Не отврати лица Твоего от мене, яко скорблю. Не попусти мне по- гибнути со беззаконьми моими, аще и недостоин есмь помилован от Тебе быти. Помилуй мя, Боже, по велицей милости Твоей! Ими же токмо веси судьбами, спаси мя, многогрешного. Яко Ты еси, Боже, Бог кающихся, и Тебе славу возсылаю, Отцу и Сыну и Святому Духу, ныне и присно и во веки веков. Аминь.

Добавить комментарий

Ваш e-mail не будет опубликован. Обязательные поля помечены *