Молитвенный вопль узника к Божией Матери

О Пресвятая Дево, Мати Господа и Спасителя моего! Вси человецы притекают к Тебе, и никто притекаяй отходит от Тебе всуе, аще о добре просит. Молят Тя архиереи и священницы, яко Матерь еси Архиерея великаго, прошедшаго небеса. Молят Тя иноки и инокини, яко Сама еси Пречистая Дева. Молят Тя отцы и матери, иже болезнуют о своих детях, в немощех лежащих или далече живущих, яко Ты Сама болезнующи искала еси Сына Своего, егда Он, дванадесятилетний Отрок, оста во Иерусалиме. Молят Тя обидимии, яко претерпела еси гонение от Ирода с Божественным Младенцем. Возносят к Тебе последнюю свою молитву умирающии, яко Ты предстояла еси у креста умирающаго Сына Твоего. Молят Тя праведнии и вси хотящии благочестиво жити, и никтоже от них достиже праведности, не имеяй Тебе молитвенницу. Тако вси имут Тя Заступницу усердну, и всем подаеши скору помощь. Един ли аз, грешник, в темнице седяй, забвен буду от Тебе? Мене ли единаго молитву не услышиши? Мене ли, прибегающего к Тебе, не приимеши под кров Твой? О, никакоже помышляю сему быти, понеже Матерь еси Спасителя погибающих грешников. Понеже яко несть инаго Бога, разве Иисуса Христа, Сына Твоего, со Отцем и Святым Духом во единем Божестве поклоняемаго, тако несть инаго у Престола Божия ближайшего ходатая, якоже Ты, Мати Божия! Матернее Твое моление много может ко благосердию Владыки, пред Ним Тебе вся возможна суть. Сего ради на Тя по Бозе все упование мое возлагаю. Сего ради храню аз пречистый образ Твой во узилищи моем, памятуяй близость Твою ко всем скорбящим и заключенным. Обаче Ты Матерь Божия и являла еси доныне ко мне многия милости по моим прошением к Тебе. Чем же аз явихся пред Тобою? Увы мне злонравному! Аз же непамятлив бых Твоих благодеяний. Но, о Милосердая Царице Богородице, прости моя измены и неразумие; не отвергни мене, паки возвращающагося к Тебе, яви ко мне древняя Твоя милости и приими мя на Свои мощные руки, аки боляща, аки еле жива суща от язв греховных. Приведи мою душу грешную к покаянию. Беззакония бо моя превзыдоша главу мою, колико доселе прогневах аз Бога моего лжами, хищениями, пиянством, крамолами, жестокосердием, безсовести- ем. Безпрестани согрешаю и в сей темнице леностию, мечтаниями, обманами, непокорством, досаждениями соузникам моим и развращением их, татьбами и роптанием на мою участь. Ктому не бысть у мене доныне ни слез, ни умиления, или же аз плаках токмо от досады моея. Примири убо мене, Благодатная, с Богом, Сыном Твоим. Сподоби мя получити разрешение во всех гресех моих в тайне покаяния и абие причаститися святаго Тела и Крове Сына Твоего. Помози ми отныне возненавидети злыя моя страсти и крепце воинствовати противу греха; зане, аще в чесом и покаюся, по малем часе таяжде творю, и сице лжив пред Богом обретаюся. Испроси ми, Владычице Богородице, благодать прочее время живота моего в твердом покаянии скончати. Милуяй грешники, не презри мене, перваго из них. Зриши моя беды, зриши мою горьку жизнь в сей темнице. Помози ми претерпети до конца позор мой, тесноту и прочия темничныя лишения, да не впаду в отчаяние, да не дерзну вознести хулы на Промысл Божий, но токмо скорблю и плачу о гресех моих, токмо от печали моея о чадех моих и сродниках, от нихже разлучен есмь, обращаюся ко утешению в молитве. Несть у меня терпения, и кийждо день мню, яко наста конец моему терпению. О, печальных недоведомое утешение! Утеши моего отца и матерь и сродники, иже скорбят о мне, для нихже аз содеяхся, яко мертв. Наипаче же, о чадолюбивая Мати, не лиши Твоего покровительства жену и чада моя, ихже оставих аз, яко преступный отец, зане они неповинни суть во гресех моих. Препитай их и сохрани здравы и богобоязненны. Даруй ми напоследок видети свободу и со слезами радости облобызати моих домашних. Из глубины души моея вопию к Тебе, Царице Небесная, от одного образа Твоего с предвечным Младенцем, на руку Твоею держимым, чувствуяй в сердце моем отраду: не отрини мене, буди ми покровительница во всяких моих нуждах, во всяком моем страхе и унынии, днем и нощию, во здравии и болезни. Облегчи моя душевныя и телесныя скорби, яко Ты еси всех скорбящих радость. Милостива буди ми не зде токмо, но и тамо, в стране вечней. Не остави мене без Твоего заступления в день Страшнаго второго пришествия Господа моего. Ей, Пресвятая Богородице! Не забуди тогда моея веры, яже к Тебе, и недостойных моих молитв пред Тобою. Да тако, быв на вечные времена помилован, в безконечныя же веки буду благодарить Тебе и славословити Отца и Сына и Святаго Духа. Аминь.

Молитвенник для заключенных

 

Добавить комментарий

Ваш e-mail не будет опубликован. Обязательные поля помечены *